Адкрыццё выставы “Графічныя афарызмы Міхаіла Лісоўскага ”

Гэта супольны праект Дзяржаўнага музея гісторыі беларускай літаратуры, Беларускага дзяржаўнага архіва-музея літаратуры і мастацтва і навуковага і метадычнага часопіса “Роднае слова”.
 
Творчасць Міхаіла Якаўлевіча Лісоўскага вызначаецца разнастайнасцю: ён працаваў ў бытавым, пейзажным і партрэтным жанрах, займаўся станковай графікай. Аднак сапраўдным яго пакліканнем стаў сяброўскі шарж, героямі якога былі і вядомыя беларускія літаратары. Дзякуючы Міхаілу Лісоўскаму шарж упэўнена ўвайшоў у беларускую мастацкую практыку і заняў годнае месца сярод іншых жанраў.

Выстава створана сумесна з Беларускім дзяржаўным архівам-музеем літаратуры і мастацтва, у фондах якой захоўваецца каштоўная калекцыя шаржаў мастака. Значная частка гэтай калекцыі прадстаўлена на выставе ў выглядзе павялічаных лічбавых копій. Наведвальнікі змогуць убачыць своеасаблівую “галерэю” беларускіх літаратараў ХХ стагоддзя – у дасціпных і вельмі пазнавальных вобразах, створаных мастаком. Працы не толькі выклікаюць усмешку, але і перадаюць атмасферу літаратурнага асяроддзя свайго часу.
 
Яшчэ адным партнёрам праекта стаў часопіс “Роднае слова”, у якім напярэдадні юбілею мастака выйшла чарговая публікацыя з цыкла “У анталогію беларускага шаржу”, прысвечаная феномену мастака Міхаіла Лісоўскага.